Mijoz uchun qo‘llanma

Buyurtma qanday beriladi

Buyurtma berish uchun ro‘yxatdan o‘tish shart emas. Ikki yo‘l bor: agent orqali yoki uning shaxsiy do‘koni sahifasidan o‘zingiz.

1-yo‘l: agent orqali

Sizga mahsulotni tavsiya qilgan odamga qaysi mahsulot kerakligini ayting. U buyurtmani rasmiylashtiradi va sizga buyurtma kodini beradi.

2-yo‘l: o‘zingiz

1. Agent yuborgan havolani oching.
2. Kerakli mahsulotni tanlang va sonini belgilang.
3. Ism va telefon raqamingizni yozing.
4. Yetkazib berish usulini tanlang va manzilni kiriting.
5. Tasdiqlang — ekranda buyurtma kodi chiqadi.

Telefon raqamini to‘g‘ri yozing

Kuryer shu raqamga qo‘ng‘iroq qiladi. Raqam noto‘g‘ri bo‘lsa buyurtma yetib bormaydi va qaytib ketadi.

Shuningdek buyurtmani kuzatishda ham shu raqamning oxirgi 4 raqami so‘raladi — bu buyurtmangizni begonadan himoya qiladi.

Manzilni qanday yozish kerak

Eng muhim maydon — mo‘ljal. O‘zbekistonda ko‘cha raqami ko‘pincha yordam bermaydi. Shu kabi yozing:

«12-maktab ro‘parasi, ko‘k darvoza, non do‘koni yonidagi burilish»

Buyurtmani o‘zgartirish yoki bekor qilish

Buyurtma hali yo‘lga chiqmagan bo‘lsa — agentingizga ayting, o‘zgartiriladi yoki bekor qilinadi. Hech qanday jarima yo‘q.

Yetkazilgandan keyin ham 14 kun ichida qaytarish mumkin — batafsil «Qaytarish» bo‘limida.